മാനത്തുണ്ടൊരു മുത്തശ്ശി

മാനത്തുണ്ടൊരു മുത്തശ്ശി

മായക്കഥയിലെ മുത്തശ്ശി

നേരം പുലരും നേരത്ത്

തെച്ചിപ്പൂക്കളിറുത്തിട്ട്

മാലകൾ തൂക്കും മുത്തശ്ശി

മന്ത്രം ചൊല്ലി വെളുപ്പിച്ച്

പുഞ്ചിരി തൂകും മുത്തശ്ശി

ചിലനാളമ്പോ കറുപ്പിച്ച്

തപ്പും തുടിയുമെടുത്തിട്ട്

പൊട്ടിച്ചിരികൾ മുഴക്കുന്നു

ഉണ്ണികൾ പേടിച്ചോടുമ്പോൾ

കാറ്റും കോളും തീർത്തിട്ട്

തുമ്പിക്കൈകൾ ചീറ്റും പോൽ

മുറ്റമടിച്ചു കഴുകുന്നു

സായം സന്ധ്യാ നേരത്ത്

പൊന്നിൻ കട്ടയെറിഞ്ഞിട്ട്

മിന്നും പൂക്കൾ വിടർത്തുന്നേ

മായക്കഥയിലെ മുത്തശ്ശി !